საქართველოს ჟურნალისტთა დამოუკიდებელი ასოციაცია

გაწევრიანდი!

ბესელია ბოდიშს იხდის

ბათუმში „ქართული ოცნების“ შტაბში გამართულ ბრიფინგზე ეკა ბესელიამ ბოდიში მოუხადა აჭარის ტელევიზიის „ახალი ამბების“ გადამღებ ჯგუფს, რომელსაც, ჟურნალისტების თქმით, „ქართული ოცნების“ მაჟორიტარობის კანდიდატმა მუხრან ვახტანგაძემ  პროფესიულ საქმიანობაში ხელი შეუშალა.

„მე არ მინახავს ეს ფაქტი, თუმცა, მომაწოდეს ინფორმაცია. არ ვფიქრობ რომ აქ რაიმე განზრახვას ჰქონდა ადგილი, რაღაც მოხდა ან მექანიკურად ან ემოციურ ფონზე. ჩვენ უზრუნველვყოფთ იმას, რომ თქვენ (ჟურნალისტებმა) იმუშაოთ ყოველგვარი შეფერხების გარეშე, არ გექნებათ არანაირი ხელის შეშლა და თუ რაიმე მოხდა მექანიკურად, ჩვენ ამის გამო ჟურნალისტებსაც და ოპერატორსაც ბოდიშს ვუხდით. ჩვენ ვიმუშავებთ თქვენთან ერთად იმისათვის, რომ თქვენ განახორციელოთ თქვენი უფლებამოვალეობა“, - განაცხადა ბესელიამ.

საზოგადოებრივი მაუწყებლის აჭარის ტელევიზიის ჟურნალისტის განცხადებით, „ახალი ამბების“ გადამღები ჯგუფი იმყოფებოდა ბათუმის 58-ე უბნის გარე პერიმეტრზე, სადაც  ის „ნაციონალური მოძრაობის“ მაჟორიტარი კანდიდატის გია აბულაძის ჩაწერას ცდილობდა.   ადგილზე მისული გადამღები ჯგუფი შეესწრო „ქართული ოცნების“ და „ნაციონალური მოძრაობის“ მაჟორიტარ კანდიდატებს შორის კამათს.

„ქართული ოცნების“ მაჟორიტარმა კანდიდატმა მუხრან ვახტანგაძემ   მოუწოდა გადამღებ ჯგუფს, რომ ინცინდენტი არ გადაეღოთ. 

„ოპერატორი არ დაემორჩილა მის მოთხოვნას, რა დროსაც მიუახლოვდა მუხრან ვახტანგაძე  ოპერატორს თანმხლებ პირებთან ერთად  და კამერაზე ხელი აუფარა“, - ამბობს აჭარის ტელევიზიის ჟურნალისტი.